第 1 章．抑鬱

我中五之前一直都係讀男校，加上天性內向又怕羞又靜，一直都冇咩女性朋友，所以直到18歲先有初戀。

我初戀情人係 A， A 響細個既時候已經全家移民左去外國，我係響佢某年暑假返香港玩既時候認識。當時仲未有ICQ, MSN,甚至EMAIL都未開始流行，我地初相識既時候除左電話，就係用書信來往。好好彩，我同佢住得好近，所以成日可以見面，真係可以一大早就搵佢食早餐，然後玩到十點就送佢返屋企。

有一次我地去一個海濱公園散步，身邊有兩個人踩單車經過時望左我地一眼，然後講：「好多人響呢度拍拖喎。」我面紅晒望住佢，之後大住膽拖佢隻手，咁就開始左我既初戀喇。我地兩個都只係學生冇咩錢，拍拖只係行街，睇電視呢啲好簡單既野，但我心入面已經好滿足。

一直到左八月，大家都知暑假完結之後就好難再見，雖然冇講到出口，但大家都開始唔開心，我地好珍惜剩低既時間。

佢走既時候我冇送佢機，因為我前一晚送完佢返屋企之後一轉身就已經喊左出黎，一直喊到兩三點先訓，眼腫聲沙。我知我就算去到機場除左喊都唔識做其他野。

當暑假結束之後我地就只能用書信來往，最後無奈分開。其實我好後悔放棄得太早，當時寫信同佢講我覺得我地好難繼續，我喊左成星期先落到筆，而每當諗起佢收信時侯我都好心痛。我因為咁樣所以患上抑鬱病。

兩小無猜真心相愛，異地相隔無奈分開。但起碼是真心相戀，再痛亦值得。


待續