第3 章．傷痛的開始

第三次係真正傷害既開始，我叫佢C。C 係家道中落既千金小姐，屋企本來好有錢，但已於兩年多前破產。C有個長期病，會令佢情緒比較燥。

剛開始時我的確感到壓力，因為雖然佢父母破左產，但其他親戚依然非常有錢，而且佢家人驚佢識錯人，所以佢幾個親戚輪流同我 " interview "，好彩佢姑姐覺得我幾好仔而且好識諗，所以順利過關。一個月後除左佢個眼角極高既大伯對我不置可否之外，世伯伯母同佢其他親戚都對我好似一家人咁。我有時都覺得自己多左個屋企。

C情緒係比較暴躁，經常一有少少不滿就開口鬧，就算響我朋友或者佢家人身邊都唔理，好多時就連世伯伯母都睇唔過眼而開口幫我鬧返佢。我因為體諒佢有病而有時身不由已而不斷忍讓，就正如我當初都係咁對 B 一樣。雖然我已經不斷忍讓同遷就，可惜我地既感情就係因為依D小爭執而不斷磨損。我一直忍讓，因為我覺得自己最後可以令佢改變，可惜事與願違。

「養隻狗陪都好過同你一齊！」
「都唔知你以前Ｄ女朋友點忍你！」
我響佢面前完全冇晒自尊，亦懷疑自己係唔係真係可以令佢改變。

大半年之後某日，我約左佢放學之後行旺角，佢當時雙失，佢話自己兩點出去一邊行一邊等我。那天我三點半放學出到旺角道已經四點半。當日天氣非常炎熱，有三十幾度，而見面時我覺得佢好奇怪，佢行左咁耐居然都冇咩出汗。（佢個病會令佢出汗比常人多）而且個身仲有一陣皂液味，就好似岩岩沖完涼咁。我問佢點解好似岩岩沖完涼咁既，佢諗左一諗先答我：轉左香水。我冇再追問落去喇。之後類似情況仲出現多兩次，我都冇深究。

但估唔到絕對信任換黎既只係絕對傷害，聰明啲既人已經估到佢見我之前去過咩地方。我唔想講我點發現，直接開估喇，你地估得冇錯。

我冇同佢講我知道左，響一次鬧交後我冇再搵佢，佢亦冇搵返我。

大半年關係就係咁完左。


待續